Z. Shkëlzen Margjeka

Shkëlzen Margjeka, auditues ligjor është anëtar i Institutit të Ekspertëve Kontabël të Autorizuar që nga viti 2008, partner anagzhimi dhe administrator i shoqërisë audituese “ACA MARGJEKA” shpk si dhe anëtar i Këshillit Drejtues të ASD.
Shkëlzen Margjeka ka qënë anëtar i Këshillit Drejtues të Institutit të Ekspertëve Kontabël të Autorizuar për përiudhën 2012-2021 si dhe Kryetar i Komitetit të Investigimit dhe Disiplinës të IEKA-s. Në vitin 1995-1999  ka qënë kryetar i Union e Pavarur Studentor Shqiptar.
Shkëlzen Margjeka ka mbaruar Fakultetin Ekonomik, Dega Finance-Kontabilitet në vitin 1998, ka mbaruar kursin pasuniversitar Financë-Bankë, Fakulteti – Ekonomik, Universiteti i Tiranës, viti 2000-2001 si dhe në vitin 2012-2014 ka mbaruar Master Shkencor në Finance-Banke, Universiteti Europian i Tiranës. Ai ka kryer kualifikime profesionale në vazhdimësi nga eksperte vendas dhe të huaj.
Shkëlzen Margjeka që nga viti 2000 e në vazhdim ka punuar si drejtor finance  në kompani sigurimi, kompani vendase dhe të huaja, ka dhënë konsulence financiare dhe fiskale,  ka ofruar shërbime në auditim-kontabilitet, ka bërë monitorime dhe kontrolle financiare  pranë KQZ, si dhe ka kryer akt-ekspertime në gjykatë dhe prokurori.

Znj. Vasilika Vjero

Zj.Vasilika Vjero ka lindur në qytetin e Tiranës në vitin 1976.
Zj.Vjero është diplomuar në Universiteti i Tiranës,  Fakulteti i Ekonomisë, në degën  Administrim Biznesi në vitin 1998. Në vitin 2003 përfundon një master nga Universiteti i Nebraskës, Lincoln USA, programi Master në Administrimin Publik në bashkëpunim me Universitetin e Tiranës, Fakulteti i Ekonomisë. Ajo gjithashtu është trajnuar lidhur me çështje të rritjes ekonomike nga Harvard Kennedy School.
Zj.Vjero ka mbajtur poste të larta drejtuese si, Drejtori i Përgjithshëm i Tatimeve, Drejtor i Përgjithshëm i Qendrës Kombëtare të Biznesit, Drejtor i Përgjithshëm i Autoritetit Rrugor Shqiptar.  Në karrierën e saj  numëron më shumë se 10 vite eksperiencë pune për Bashkinë e Tiranës në menaxhimin e Administratës Tatimore dhe Departamentit të Planifikimit Strategjik dhe buxheteve vendore, si dhe nje sërë eksperiencash si ekspert financiar me donatorë të huaj. Po ashtu ka shërbyer si ekspert i pavarur fiskal dhe buxhetor për qeverisjen lokale në Shqipëri për një total prej 24  bashkish dhe komunash në të gjithë vendin.
Zj.Vjero zotëron gjuhën angleze dhe atë italiane.

Z. Genci Mamani

Genci Mamani është Drejtor i Përgjithshëm i Agjencisë së Sigurimit të Depozitave dhe njëkohësisht anëtar i Këshillit Drejtues të saj.
Z. Mamani, ka mbaruar studimet në vitin 1991 pranë Universitetit të Tiranës, Fakulteti i Ekonomisë, Dega Financë.
Në vitin 2001 kreu studimet pasuniversitare pranë Universitetit Wisconsin – La Cross për financë – bankë. Në vitin 2012 ka kryer studimet pasuniversitare në nivelin master për Administrim Biznesi pranë International Hellenic University, në Selanik, Greqi.
Karrierën e tij Z. Mamani e ka nisur në vitin 1991 si ekonomist në Bankën e Shtetit. Më pas ka punuar pranë Bankës FEFAD (sot ProCredit Bank), Bankën Italo – Shqiptare  dhe më tej pranë Bankës së Shqipërisë deri në vitin 2015 duke mbajtur poste drejtuese në këto institucione.  Në korrik të vitit 2015 ai mori detyrën e Drejtorit të Agjencisë së Sigurimit të Depozitave.
Zoti Mamani zotëron gjuhët anglisht dhe italisht.

Z. Donald Duraj

Z. Donald Duraj është emëruar në detyrën e Kryetarit të Këshillit Drejtues të Agjencisë së Sigurimit të Depozitave në vitin 2015. Z. Donald Duraj ka një karrierë progresiste më shumë se 10-vjecare në sistemin bankar, pjesë integrale e së cilës kanë qenë pjesëmarrja mjaft aktive dhe arritjet e suksesshme brenda institucioneve të ndryshme prestigjioze financiare lokale dhe atyre në rrjetin ndërkombëtar si në Austri, Poloni, Sllovaki, Ukrainë e Bjellorusi. Që prej vitit 2015 Z. Duraj mban detyrën e Shefit të Kabinetit të Guvernatorit të Bankës së Shqipërisë me përgjegjësi këshillimi, asistimi, raportimi dhe koordinimi për të gjitha çështjet e lidhura me mbarëvajtjen dhe mirëfunksionimin e Kabinetit por dhe të departamenteve të tjera të Bankës së Shqipërisë. Nga viti 2010 e deri në vitin 2015 Përgjegjës i Sektorit të Organizimit Komercial dhe Zhvillimit të Tregut në Bankën Societe Generale Albania duke luajtur një rol kryesor drejtimin strategjik, planifikimin afat-shkurtër dhe afat-gjatë, përcaktimin e objektivave kryesore, koordinimin e marrëdhënieve ndër-divizionale dhe ndër-institucionale, në nivel lokal dhe ndërkombëtar, me kompani publike dhe private, etj. Gjatë kësaj periudhe Z. Duraj ka drejtuar me sukses të paktën 15 projekte, ndër më të rëndësishmit për Bankën, dhe me një ndikim të drejtpërdrejtë në zgjerimin e aktivitetit në tregun lokal dhe në rritjen e përfitueshmërisë. Z. Duraj ka punuar nga viti 2005 deri në vitin 2010 në Raiffeisen Bank Albania dhe Raiffeisen Intenational Austria duke mbuluar pozicione kyçe të karakterit operacional dhe strategjik. Më të rëndësishmet prej tyre janë si Përgjegjës i Segmentit të Individëve, Përgjegjës i Produkteve i Kredisë Konsumatore, Drejtues i Projekteve në Programin “Retail Leadership” pranë Raiffeisen Intenational Austria, etj. Z. Duraj ka përfunduar studimet e larta në Fakultetin Ekonomik, Dega Financë – Profili Bankë, pranë Universitetit të Tiranës.

12/11/2014

Fondi i Sigurimit të Depozitave: Çështje kryesore, Qasje të ndryshme

Data e fillimit: 09/12/2014
Data e mbarimit 11/12/2014
Vendndodhja: Tiranë
Pershkrimi:

Agjencia e Sigurimit të Depozitave organizon Seminarin Ndërkombëtar të Nivelit të Lartë me tematikë “Fondi i Sigurimit të Depozitave: Çështje kryesore, Qasje të ndryshme”.

Agjencia e Sigurimit të Depozitave (ASD) në bashkëpunim me Organizatën Ndërkombëtare të Siguruesve të Depozitave (IADI) organizoi në Tiranë nga data 09 – 11 dhjetor 2014, Seminarin Ekzekutiv “Fondi i Sigurimit të Depozitave: Çështje kryesore, Qasje të ndryshme”.

Gjatë tre ditëve, seminari trajtoi temën e fondeve në dispozicion të skemave të sigurimit të depozitave në juridiksione të ndryshme, si dhe mënyrat për plotësimin e tyre me qëllim sigurimin e depozitave dhe kompensimin e depozituesve, nëse lind nevoja. Seminari adresoi këtë temë përmes shkëmbimit të eksperiencave dhe diskutimit të metodologjive të ndryshme që sigurues të depozitave aktualisht zbatojnë në vendet e tyre. Në punimet e seminarit pati prezantime nga sigurues që kanë themeluar sigurimin e depozitave si disiplinë të sigurisë financiare, si Korporata Federale e Sigurimit të Depozitave të Shteteve të Bashkuara të Amerikës (FDIC) dhe Korporata e Sigurimit të Depozitave të Kanadasë (CDIC), si dhe sigurues evropianë me përvojë si Mbretëria e Bashkuar, Polonia dhe Zvicra.

Në fjalën e hapjes të Seminarit, Drejtori i Përgjithshëm i Agjencisë së Sigurimit të Depozitave, Z. Toni Gogu, duke i uruar mirëseardhjen pjesëmarrësve në seminar, renditi çështjet kryesore të cilat do të jenë objekt i diskutimeve gjatë tre ditëve të seminarit. Këto çështje lidhen me (i) fondin optimal në dispozicion të siguruesve të depozitave; (ii) mënyrat e sigurimit të këtyre fondeve; (iii) menaxhimin e fondeve; dhe (iv) krijimin e fondeve rezervë. Z. Gogu vlerësoi rëndësinë e Organizatës Ndërkombëtare të Siguruesve të Depozitave (IADI) në përcaktimin e standardeve në fushën e sigurimit të depozitave dhe specifikisht mbi çështjen e financimit.

Seminari Ekzekutiv i Agjencisë së Sigurimit të Depozitave u përshëndet nga Zv. Guvernatorja e Parë e Bankës së Shqipërisë, Znj. Elisabeta Gjoni. Gjatë fjalës së mbajtur në këtë aktivitet Znj. Gjoni theksoi rolin e rëndësishëm që luan Agjencia e Sigurimit të Depozitave në ruajtjen e stabilitetit të sistemit financiar të vendit, si një nga pjesëmarrësit e rrjetit të sigurisë financiare në vend. Ajo nënvizoi rëndësinë që Banka e Shqipërisë, në cilësinë e Autoritetit Mbikqyrës, i kushton marrëdhënies institucionale me Agjencinë e Sigurimit të Depozitave duke e mbështetur atë në iniciativa të rëndësishme për të përmbushur me efikasitet misionin e saj.

Seminari u adresua dhe nga Zv. Ministri i Financave, Z. Erjon Luçi. Z. Luçi vlerësoi se Ministria e Financave është e angazhuar dhe plotësisht e ndërgjegjësuar mbi rolin e ASD-së si administratore e skemës se sigurimit te depozitave. Në fjalën e tij Z. Luçi renditi disa nga zhvillimet kryesore të ndërmarra në bashkëpunim midis Ministrisë së Financave dhe Agjencisë së Sigurimit të Depozitave. Më të rëndësishmet prej tyre janë negocimi dhe miratimi i marrëveshjes me BERZH për Linjën e Kredisë, e cila përfaqëson një burim alternativ financimi për Agjencinë; si dhe miratimi i Ligjit të ri “Për sigurimin e depozitave”, si rezultat i të cilit janë përmbushur rekomandimet e Misionit FSAP të Bankës Botërore dhe Fondit Monetar Ndërkombëtar.

Në seminar morën pjesë përfaqësues të lartë të 20 institucioneve të sigurimit të depozitave nga e gjithë bota, përfshirë Shtetet e Bashkuara të Amerikës, Kanada, Gjermani, Mbretëria e Bashkuar, Kosova, Greqia, Rumania, Korea e Jugut, Malaizia, Filipinet, Zimbabve, etj. Gjithashtu, të ftuar në seminar ishin zyrtarë nga Ministria e Financave, Banka e Shqipërisë si dhe përfaqësues nga bankat e nivelit të dytë në Shqipëria.

Filloni të shkruani dhe shtypni enter për të kërkuar

Scroll to Top