Përshkrimi i vendit të punës:
Agjencia e Sigurimit të Depozitave për nevoja të plotësimit të vendeve të punës, shpall për konkurim 1 vend të lirë pune, në pozicionin si vijon:
- “Kryespecialist për çështjet e administratës”, pranë Sektorit të Administratës dhe Burimeve Njerëzore në Agjencinë e Sigurimit të Depozitave;
Kandidatët që kërkojnë të aplikojnë për konkurim duhet të plotësojnë kriteret e mëposhtme:
Kritere të përgjithshme:
- Të kenë si rregull shtetësinë shqiptare;
- Të gëzojnë zotësi të plotë për të vepruar;
- Të përmbushin kërkesat për llojin dhe nivelin arsimor, si dhe të zotërojnë aftësitë profesionale të domosdoshme për vendin përkatës të punës sipas kritereve të miratuara;
- Të jenë të aftë për punë;
- Të mos jenë të dënuar me një vendim gjykate të formës së prerë për kryerjen e një krimi;
- Të mos jetë marrë ndaj tyre masa disiplinore e largimit nga puna për shkak të një shkeljeje të rëndë disiplinore;
- Të angazhohen të respektojnë zbatimin e ligjit “Për Sigurimin e Depozitave”, të ndryshuar, si dhe dispozitat e tjera ligjore dhe nënligjore në fuqi.
Kritere specifike për pozicionin e punës “Kryespecialist për çështjet e administratës”, pranë Sektorit të Administratës dhe Burimeve Njerëzore në Agjencinë e Sigurimit të Depozitave:
- Preferohet të jetë diplomuar në Fakultetin Ekonomik/ Inxhinjerisë/Juridik/Shkenca filologjike;
- Të ketë jo më pak se 3 vjet eksperiencë pune në nivel administrimi;
- Aftësi për të kuptuar propozimet dhe vendimet e cdo niveli dhe për ti zbatuar ato;
- Të ketë aftësi për të kryer me përgjegjësi detyrën në përputhje me aktet ligjore në fuqi;
- Aftësi komunikuese me shkrim (në hartimin e shkresave zyrtare) e me gojë;
- Njohuri në përdorimin e programe Word, Excel, Power Point;
- Njohuri të mira të gjuhës angleze; njohja e një gjuhe të dytë ndërkombëtare përbën avantazh;
- Nota mesatare preferohet mbi 8 (tetë);
- Të ketë aftësi shumë të mira të komunikimit, organizimit dhe punës në grup;
- Të ketë aftësi për të zhvilluar njohuritë akademike dhe profesionale, të ndjekë ndryshimet dhe përmirësimet e legjislacionit shqiptar që lidhen me fushën e sigurimit të depozitave.
- Të ketë angazhimin për të përballuar mbingarkesëdhe punë me orar të zgjatur.
- Të jetë i aftë të kryejë detyra të tjera të caktuara nga eprorët përkatës.
Fushat e njohurive, dhe literatura mbi të cilat do të zhvillohet testimi dhe intervista për pozicionin e punës “Kryespecialist për çështjet e administratës”, pranë Sektorit të Administratës dhe Burimeve Njerëzore në Agjencinë e Sigurimit të Depozitave.
Kandidatët do të testohen në lidhje me:
- Kodi i Punës së Republikës së Shqipërisë;
- Ligji Për Sigurimin e Depozitave;
- Statuti i Agjencisë;
- Ligji Për prokurimin publik;
- Vendimi i Këshillit të Ministrave “Për rregullat e prokurimit publik”, i ndryshuar;
- “Kodi i Etikës i Agjencisë së Sigurimit të Depozitave”;
- Rregullore Për punën me dokumentat administrative dhe korrespondencën elektronike në Agjencinë e Sigurimit të Depozitave;
- Rregullore Për mbrojtjen, përpunimin, ruajtjen dhe sigurinë e të dhënave personale në Agjencinë e Sigurimit të Depozitave;
- Rregullore Mbi procedurat dhe kriteret e zhvillimit të burimeve njerëzore;
- Rregullore Mbi kryerjen e praktikës mësimore të studentëve me arsim të lartë pranë Agjencisë së Sigurimit të Depozitave;
- Rregullore “Mbi marrëdhëniet e Agjencisë së Sigurimit të Depozitave me bashkëpunëtorët e jashtëm”;
- Udhëzimi “Për strukturën dhe nivelin e pagave bazuar në klasifikimin e vendeve përkatëse të punës në Agjencinë e Sigurimit të Depozitave”;
- Udhëzimi “Për kuotat dhe procedurat e kryerjes së shpenzimeve të nevojshme lidhur me aktivitetet zyrtare të ASD -së”;
- Udhëzimi “Për shpenzimet e daljes brenda dhe jashte shtetit për shërbim, kualifikim, specializim, etj të personelit të ASD –së”;
- Udhëzimi “Për shpenzimet për pritjen, përcjelljen dhe trajtimin që u bëhet personaliteteve të shtetit shqiptar dhe delegacioneve të huaja, që vijnë në ASD”;
- Akteve të tjera nënligjore të Agjencisë të miratuara nga Këshilli Drejtues.
Kandidatët që do të aplikojnë për konkurim duhet të paraqesin dokumentet e mëposhtme:
- Curriculum Vitae;
- Diplomë të shkollës së lartë (sipas kërkesës së vendit përkatës së punës);
- Listë notash;
- Dokumenti i Laurimit në gradë shkencore, në qoftë se ka;
- Dëshmi të ndryshme kualifikimi dhe specializimi;
- Dëshmi të gjuhëve të huaja;
- Vërtetim shëndetësor nga Komisioni Mjeko-Ligjor;
- Vërtetim nga prokuroria, gjykata dhe dëshmi penaliteti, ku të vërtetohet që nuk jeni i dënuar ose në ndjekje penale;
- Çertifikatë e gjendjes familjare;
- Të mos jetë i larguar nga puna për masa disiplinore në bazë të ligjit për nëpunësin e shërbimit civil në Republikën e Shqipërisë dhe/ ose Kodit të Punës;
- Fotografi 2 copë;
- Fotokopje e ID-së.
Si dhe të paraqiten pranë Agjencisë së Sigurimit të Depozitave (Rruga Elbasanit, Pall Edil Al It, Nr. 317, Tiranë) për të tërhequr formën e aplikimit, çdo ditë pranë Sektorit të Administratës dhe Burimeve Njerëzore ose mund ta gjejnë atë në link-un e mëposhtëm në faqen tonë zyrtare në internet:
Konkurimi në Agjencinë e Sigurimit të Depozitave bëhet në bazë të proçedurave të miratuara nga Këshilli Drejtues i Agjencisë me dy faza:
- Në fazën e parë, bëhet përzgjedhja e kandidatëve që do t’i nënshtrohen testimit të mëtejshëm, e cila konsiston në verifikimin nëse dokumentacioni i paraqitur nga çdo kandidat vërteton plotësimin e kërkesave të përgjithshme dhe të kërkesave specifike, të përcaktuara në shpalljen për konkurim. Vetëm kandidatët që plotësojnë këto kërkesa, i nënshtrohen fazave të mëtejshme të konkurimit.
- Në fazën e dytë, zhvillohet testimi i kandidatëve në dy etapa:
- për zotërimin e gjuhës angleze;
- për nivelin e njohurive profesionale.
Në qoftë se rezultati i testimit për zotërimin e gjuhës së huaj është nën nivelin minimal të përcaktuar, kandidati nuk kualifikohet për fazat e mëtejshme të konkurimit.
Dokumentacioni të paraqitet në formë shkresore dhe elektronike me email brenda datës 15.03.2022. Pas kësaj date nuk pranohet asnjë dokument. Data e zhvillimit të fazës së dytë të konkurimit do të caktohet në një njoftim të dytë.
- Kandidati, i cili dëshiron të konkurrojë, mund të paraqitet çdo ditë pranë Agjencisë së Sigurimit të Depozitave, për tu njohur me kriteret e vendeve të punës të shpallura për konkurim dhe për të plotësuar kërkesën përkatëse sipas formatit të miratuar nga Agjencia;
- Dokumentacioni i kërkuar të dorëzohet në Agjencinë e Sigurimit të Depozitave, i mbyllur në zarf me adresën përkatëse dhe të jetë i plotësuar sipas kërkesave të mësipërme, si dhe në formë elektronike në adresën lhado@asd.gov.al
(Dokumentacioni duhet të jetë origjinal ose fotokopje e noterizuar, mosparaqitja e plotë e dokumentacionit sjell skualifikim të kandidatit).