Më 5 tetor 2026, Drejtori i Përgjithshëm i Agjencisë së Sigurimit të Depozitave, z. Mina Kusta, së bashku me drejtues të tjerë të Agjencisë, mori pjesë në takimin konsultativ me anëtarët e tryezës të konsultimit të Platformës së Partneritetit për Integrimin Evropian (PPIE). Takimi u organizua nga Autoriteti i Mbikëqyrjes Financiare. Në të u prezantuan projektligji “Për sigurimin e depozitave”, i hartuar nga ASD, dhe projektligji “Për disa shtesa dhe ndryshime në ligjin nr. 76/2023 ‘Për fondet e pensionit privat'”, i hartuar nga AMF. Të dyja nismat synojnë përafrimin e legjislacionit shqiptar me acquis të Bashkimit Evropian dhe kontribuojnë në përmbushjen e piketave mbyllëse të Kapitullit 9 “Shërbimet Financiare”.
Takimi u hap nga Drejtoresha e Përgjithshme Ekzekutive e AMF-së dhe Negociatore e Kapitullit 9, znj. Adela Xhemali. Ajo paraqiti ecurinë e akteve që po hartohen në kuadër të këtij kapitulli.
Në fjalën e tij, z. Kusta theksoi se projektligji i ri është hap i rëndësishëm për forcimin e mbrojtjes së depozituesve dhe për modernizimin e skemës së sigurimit të depozitave sipas standardeve evropiane. Ai vuri në dukje se ndryshimet e propozuara synojnë një proces kompensimi më të shpejtë dhe më efektiv, forcimin e rolit të Agjencisë në rrjetin e sigurisë financiare dhe ruajtjen e besimit të publikut në sistemin bankar.
Përfaqësuesit e ASD-së i njohën të pranishmit me ndryshimet kryesore që sjell projektligji, i cili synon linjëzimin e plotë me Direktivën 2014/49/BE “Për skemat e garantimit të depozitave”, të ndryshuar me Direktivën 2026/804/BE. Ndër to janë rritja e nivelit të mbulimit të depozitave në banka nga 2,5 milionë lekë në 6 milionë lekë dhe aktivizimi i skemës në rast padisponueshmërie të depozitave, pa pritur procesin e likuidimit. Projektligji parashikon gjithashtu kalimin në primin e bazuar në rrezik dhe dispozita shtesë për informimin e depozituesve nga bankat dhe shoqëritë e kursim-kreditit. Me anëtarësimin e Shqipërisë në BE, niveli i mbulimit do të njehsohet me atë të Bashkimit Evropian dhe afati i kompensimit do të shkurtohet më tej, sipas standardeve evropiane.
Takimi u zhvillua si forum konsultimi dhe diskutimi. Anëtarët e tryezave patën mundësinë të paraqesin komentet dhe sugjerimet e tyre për dispozitat e propozuara.
Agjencia e Sigurimit të Depozitave do t’i vlerësojë komentet dhe sugjerimet e paraqitura gjatë takimit. Procesi do të vijojë me të gjitha hapat e nevojshëm të procedurës legjislative, deri në miratimin e projektligjit nga Kuvendi i Republikës së Shqipërisë.
