Në datën 25 Shkurt 2026, Këshilli Drejtues i Agjencisë së Sigurimit të Depozitave zhvilloi mbledhjen e radhës.

Në këtë mbledhje Këshilli Drejtues mori në shqyrtim dhe vendosi:

• Mbi miratimin e “Raportit Vjetor të Agjencisë së Sigurimit të Depozitave për vitin 2025”.

Në mbështetje të nenit 7, të nenit 52 pika 1, shkronja (l) dhe të nenit 53, pika 5, shkronja (ë) të ligjit nr. 53/2014, datë 22.05.2014 “Për sigurimin e depozitave” i ndryshuar, të nenit 7, pika 6, të nenit 8, pika 2, shkronja “d” të Statutit të Agjencisë së Sigurimit të Depozitave, të miratuar me Vendim të Këshillit Drejtues nr. 24, datë 31.10.2018, Këshilli Drejtues miratoi Raportin Vjetor për veprimtarinë e Agjencisë për vitin 2025.

Raporti Vjetor përbën dokumentin më të rëndësishëm i cili, në mënyrë transparente, informon Kuvendin, Ministrinë e Financave, dhe Bankën e Shqipërisë në cilësinë e Autoritetit Mbikëqyrës si dhe publikun mbi veprimtarinë e Agjencisë së Sigurimit të Depozitave.

Projekt-Raporti Vjetor për vitin 2025 synon të japë një përmbledhje të të dhënave lidhur me skemën e sigurimit të depozitave si dhe të veprimtarisë së Agjencisë në përmbushje të objektivit dhe detyrimit të saj ligjor, sigurimin dhe kompensimin e depozituesve. Projektraporti jep një pasqyrë të skemës së sigurimit të depozitave, gjendjen e depozitave në sistemin bankar dhe jobankar, administrimin e mjeteve financiare të Agjencisë, si dhe trajton çështje të administrimit dhe organizimit strukturor të Agjencisë.

Më tej, Projekt-Raporti jep një informacion të detajuar të projekteve më të rëndësishme të Agjencisë gjatë vitit në raportim. Këtu vlen të përmendet si një nga projektet me rëndësi të veçantë, “Rishikimi i kuadrit ligjor të skemës së sigurimit të depozitave për përafrimin e plotë me legjislacionin e Bashkimit Evropian”. Agjencia mbetet plotësisht e angazhuar në përmbylljen e procesit të harmonizimit të kuadrit ligjor me Direktivën 2014/49/BE.

Intensifikimi i trajnimit të stafit teknik dhe përgatitja për skenarë të mundshëm të falimentimeve bankare, proceset e simulimit dhe verifikimit, si dhe bashkëpunimi i ngushtë me  bankat dhe shoqëritë e kursim kreditit, janë prioritetet e këtij projekti, të cilat synojnë forcimin e  mekanizmave mbrojtjes së depozituesve.

Zhvillimi dhe zbatimi i një strategjie gjithëpërfshirëse komunikimi dhe ndërgjegjësimi për publikun, ka qënë gjithashtu, në vëmendjen e veçantë të strukturave përkatëse të Agjencisë, të cilat janë angazhuar në këtë drejtim përmes mjeteve të aksesueshme dhe transparente, si: fushata informuese, platforma digjitale, mediat sociale dhe bashkëpunimi me sistemin arsimor, në funksion të rritjes së njohurive të qytetarëve mbi funksionimin e skemës së sigurimit të depozitave.

Një rëndësi e veçantë në vitin 2025 i është kushtuar gjithashtu rritjes e së mëtejshme të profesionalizmit të stafit, duke hartuar dhe zbatuar një strategji të zhvillimit të burimeve njerëzore, e cila përfshin kualifikimin dhe certifikimin e punonjësve në standarde ndërkombëtare, si dhe mekanizma të qartë vlerësimi të performancës.

Gjithashtu, projekte të rëndësishme të cilat vlen të përmendim janë, rritja e kapaciteteve të menaxhimit financiar, auditimit të brendshëm dhe digjitalizimit të proceseve të brendshme në funksion të përmirësimit të efikasitetit dhe transparencës institucionale, si dhe përmirësimi i raportimit institucional dhe të ndërtimi i kanale efektive për komunikim të rregullt me aktorët financiarë, mediat dhe organizatat e shoqërisë civile.

Këto projekte synojnë më tej, përforcimin e efikasitetit profesional dhe gatishmërinë e Agjencisë për përmbushjen e objektivave të saj publikë, në funksion të mbrojtjes së depozituesve.

Këshilli Drejtues shqyrtoi gjithashtu edhe informacione e materiale të tjera në funksion të mbarëvajtjes së veprimtarisë funksionale dhe operacionale të Agjencisë së Sigurimit të Depozitave.