Në mbledhjen e datës 30 Maj 2019, Këshilli Drejtues i Agjencisë së Sigurimit të Depozitave, mori në shqyrtim dhe vendosi:
- Informacion mbi Rezolutën e Kuvendit të Shqipërisë për vlerësimin e veprimtarisë së Agjencisë së Sigurimit të Depozitave për vitin 2018 si dhe planin e masave për adresimin e rekomandimeve të Kuvendit.
Këshilli Drejtues u njoh me Rezolutën e Kuvendit të Shqipërisë për vlerësimin e veprimtarisë së Agjencisë së Sigurimit të Depozitave për vitin 2018. Rezoluta vlerëson veprimtarinë e Agjencisë sa i takon angazhimit në drejtim të përmbushjes me efiçencë të mandatit të saj ligjor dhe bashkëpunimit ndërinstitucional me anëtarët e Grupit Këshillimor të Stabilitetit Financiar. Këshilli Drejtues u informua dhe për planin e masave të Agjencisë në lidhje me zbatimin e rekomandimeve të Rezolutës së Kuvendit të Shqipërisë.
- Mbi miratimin e disa ndryshimeve në rregulloren “Për Politikën e administrimit të mjeteve financiare të Agjencisë së Sigurimit të Depozitave” të ndryshuar.
Këshilli Drejtues miratoi propozimin e Komitetit të Investimeve të Agjencisë së Sigurimit të Depozitave për disa ndryshime në rregulloren “Për Politikën e administrimit të mjeteve financiare të Agjencisë së Sigurimit të Depozitave” të ndryshuar. Ndryshimet e miratuara synojnë t’i mundësojnë Agjencisë pjesëmarrjen në tregjet e zhvilluara ndërkombëtare të tregtimit të titujve.
Këshilli Drejtues shqyrtoi dhe miratoi informacione e materiale të tjera në funksion të mbarëvajtjes së veprimtarisë funksionale dhe operacionale të Agjencisë së Sigurimit të Depozitave.
